Á siglingunni inn fjörðinn er léttur hádegisverður og kaffi á könnunni. Fiskurinn sem veiddist er flakaður og meðlæti gert klárt fyrir grill að kvöldi dags. Nú er betra að hafa augun opin því hvalir eru mjög algengir í Arnarfirði, hnúfubakur gæti verið á leik í firðinum og svo er frekar líklegt að haförn fljúgi yfir, fjörðurinn heitir jú Arnarfjörður. Fræðst er um hafið, veiðar og mannlíf fyrr og nú. Náttúran er einstök í Arnarfirði, allt gott nesti fyrir hugann.

Þegar komið er inn á Geirþjófsfjörð er akkeri varpað innst í firðinum og léttbátur sjósettur. Nú er fyrir höndum ganga um söguslóðir Gísla sögu Súrssonar, sögustund sem allir munu hafa gaman af. Bær Auðar heimsóttur, Fylgsnið, Kleyfin og Einhamar eru meðal sögustaða sem komið er til. Tekið er með nesti til að snæða á einum áfangastaðnum. Að loknum söguhring er haldið til skips á ný.

Þegar allir eru komnir um borð er siglt út fjörðinn og komið við á skjólsælum stað, akkeri varpað og allir ferjaðir í land. Á meðan kolin hitna fær fólk sér léttan göngutúr og skoðar sig um, leikur sér í fjörunni eða bara situr og nýtur útsýnisins.
Nú er framreiddur kvöldverður, fyrst forréttur og síðan aðalréttur og svo er endað með eftirrétti og ketilkaffi. Fiskurinn frá því um morguninn mun smakkast frábærlega og allt annað sem planað hefur verið.
Þegar allir hafa fengið nóg og eru sáttir er haldið til skips á ný og siglt til Bíldudals. Ekki er ólíklegt að klukkan verði á bilinu 22.00 til 23.00 þegar til hafnar er komið eftir frábæran dag.